SEAG: HINAING NG COACHES, TINALAKAY NG PSC BOARD

NAKAHARAP ni Team Philippines Chef de Mission and Philippine Sports Commission Chairman William Ramirez ang may 150 national coaches, upang mapag-usapan ang anumang problema at updates sa nalalapit na 30th Southeast Asian Games kamakalawa sa PhilSports Complex, Pasig.

Ang pagpupulong ay isinagawa matapos ang matagumpay na unang delegation meeting sa national sports associations, kasama sina Philippine Olympic Committee President Ricky Vargas at Philippine Southeast Asian Games Organizing Committee Chairman and Congressman-elect Alan Peter Cayetano noong Hunyo 4 sa PICC.

Binuksan ni Ramirez ang diskusyon sa harap ng national coaches mula sa 58 sports upang magdaos ng assessment at evaluation sa gitna ng antas ng paghahanda ng Team Philippines para sa SEA Games.

“If we are united, we can produce miracle in the Southeast Asian Games,” ani Ramirez at inulit ang panawagan ng pagkakaisa sa sports.

Pinuri rin ng agency chief ang coaches at trainers sa kanilang suporta para sa national athletes sa training at paghahanda sa Games. (ATD)