4TH WIN, ITINALA NI VALDEZ SA PVL

TINAPOS ng defending champion Creamline ang unang round sa pamamagitan ng pagposte ng ika-4 na sunod nilang panalo makaraang walisin ang BaliPure, 25-19, 25-18, 25-23, kahapon sa Premier Volleyball League Season 3 Reinforced Conference sa FilOil Flying V Center sa San Juan.

Tumatag sa pagkakaluklok nila sa solong ikalawang puwesto ang Cool Smashers makaraang umangat sa markang 4-1, panalo-talo. Pinangunahan ng 5-time league MVP na si Alyssa Valdez ang nasabing panalo sa ipinoste nitong 16 puntos na kinabibilangan ng 12 kills at 4 na service aces bukod pa sa 10 digs.

Nag-ambag ang kanilang Thai import na si Kuttika Kaewpin ng 11 puntos at ang Venezuelan na si Aleoscar Blanco ng 9 na puntos. Nakagawa si Jia Morado ng 19 excellent sets na may 4 points.

Nanguna naman para sa winless pa ring Water Defenders (0-5) sina import Alexandra Vajdova na gumawa ng 17 puntos at tig-8 digs at receptions at si Danijela Dzakovic ay may naiambag na 10 puntos. (VA)