PAGSASAAYOS NG MARKA, TARGET NI ARDINA SA LPGA

SISIKAPIN ni Pinay parbuster Dottie Ardina na makakuha ng magandang marka sa kanyang professional career sa pagsabak niya sa 2019 Meijer LPGA Classic for Simply Give sa palaruan ng Grand Rapids sa Michigan, bukas Huwebes.Matatandaang unti-unti nang kinakikitaan ng makinang na porma si Ardina sa LPGA.

Noong nakaraang US Women’s Open Golf Championship sa Charleston, South Carolina, nakaiwas sa maagang pag-eempake si Ardina matapos kumartada ng sub-par performances at maagang nakapasok sa weekend play.

Pumasok pa siya sa top 15 pero nawala ang kanyang pulso sa huling dalawang rounds kaya nakawala sa Pinay ang tsansang makapasok sa unang 10 performers.

Sa nakalipas na ShopRite LPGA Classic sa Galloway, New Jersey, mainit na arangkada ang nasaksihan kay Ardina sa opening round pero sa 2nd round ay dumausdos ang kanyang palo kaya umuwi na ito na eliminated sa huling dalawang rounds.