Negosyante ginulpi ng tenant

SA ospital ang bagsak ng 41-anyos na negosyante matapos gulpihin ng kanyang tenant makaraan ang kanilang argumento sa Valenzuela City, kamakalawa ng hapon.

Isinugod sa Valenzuela Medical Center si Eddie Llena Manzanero, sanhi ng tinamong sugat sa mukha at katawan.

Sumuko naman ang suspek na si Mervin Gripon, 35, ng Blk. 3, Lot 23, Northville 13, sa rumespondeng mga barangay tanod.

Alas-2:30 ng hapon nang magkaroon ng argumento sa pagitan ng biktima at suspek hinggil sa pag-alis ni Gripon sa inuupahang bahay na pag-aari ni Manzanero.

Sa kainitan ng pagtatalo, sunud-sunod na sinapak ng suspek ang biktima hanggang sa bumagsak.

Inginudngod pa ng suspek ang mukha ng biktima sa semento bago ito naawat ng kanyang mga kapitbahay.