National ID, aarangkada na

AARANGKADA na simula Setyembre hanggang Disyembre ng kasalukuyang taon ang pilot testing ng national identification system.

Ito ang inanunsiyo ni Presidential Spokesman Salvador Panelo batay sa naging update nina Socioeconomic Planning Secretary Ernesto Pernia at National Statistician Dennis Mapa sa gabinete kaugnay sa implementasyon ng Philippine ID System. Ani Panelo, bago matapos ang termino ni Pangulong Rodrigo Duterte sa 2022, aabot sa 107 milyong mga Pilipino ang target na ma-register sa bagong sistema.

“There will be a pilot testing which will run from September to December 2019 to register a substantial number of Filipinos, nationwide,” sabi ni Panelo.

“By the end of the president’s term in 2022, 107 million Filipinos are targeted to be registered,” ani Panelo.

Matatandaang, nilagdaan ng pangulo noong August 6 ng nakaraang taon ang Republic Act 11055 o Philippine Identification System (PhilSys Act) na layong pag-isahin ang doble-dobleng government IDs sa pamamagitan ng paggawa ng iisang national identification system.

Ilalagay sa Phil-ID ang PhilSys number at full name ng cardholder, pati na ang larawan nito, kasarian, araw ng kapanganakan, blood type at address. Mayroon ding biometric information sa card tulad ng full set ng fingerprints at iris scan.