Pangulo at Kongreso ‘pag nagtulungan, maraming repormang magagawa
PARA sa atin, mahalagang isyu kung ikukumpara natin ang mga kandidato sa susunod na Speaker ng House of Representatives.
Ito ay kung anuman ang posisyon at reaksiyon ng kandidato noong panahon na nagwawala ang dilawan laban kay dating Pangulong Gloria Macapagal-Arroyo.
Ipinakulong ng administrasyon ni dating Pangulong Benigno Simeon “Noynoy” Aquino III si ex-P-GMA at binatuhan ng maraming kaso. Lahat ng kaso ay naipawalambisa at pinalaya siya ng korte.
Limang taon ang ninakaw sa kanyang buhay, limang taon siyang nakakulong sa maliit na kuwarto sa Veterans Memorial Hospital at hindi siya pinayagang magkaroon ng telebisyon o internet.
Kaunti lang ang dumadalaw sa kanya, sa pagkakataong ito nakita ang tunay niyang mga kaibigan at kabilang na si Rep. Martin Romualdez ng Leyte.
Hindi natakot kay ex-P-Noy si Rep. Romualdez, dinipensahan niya si ex-P-GMA at inalagaan ang KAMPI Partylist ng dating pangulo para hindi mawala sa politika.
Noong nakaraang taon, naging Speaker ng Kongreso si ex-P-GMA, si Romualdez ang kanyang “understudy” at marami siyang natutunan sa pagpapatakbo ng Lehislatura.
Nakita niya kung gaano kagaling si ex-P-GMA sa pagdisiplina ng Kongreso kaya marami itong naipasang batas (hindi tulad ng mabagal na Senado). Maganda rin ang dayalogo sa pagitan nina Pangulong Rodrigo Duterte at ex-P-GMA.
Isa itong mahalagang leksiyon para sa susunod na Speaker na kapag nagtutulungan ang Kongreso at ang pangulo, maraming reporma ang magagawa para sa bayan.
Samantala, kontra naman si Rep. Alan Peter Cayetano kay Martin Romualdez, na parang dilaw sa asul ang pagkakaiba. Sumikat si Cayetano bilang lider-lideran ng mga maiingay na pulitiko na nagpapalakas noon kay ex-P-Noy kaya panay banat kay ex-P-GMA.
Pati biography niya sa kanyang Senate website ay ipinagmalaki niyang spokesman siya ng impeachment team na nanira kay ex-P-GMA para makulong ito. “Proud” pang sinabing ang blue ribbon committee niya ang nag-imbestiga sa NBN-ZTE deal, isa pang kaso na naipawalambisa rin, inaksaya lang ni Cayetano ang pera at panahon ng bayan.
Kasama noon ni Cayetano sina Senador Antonio Trillanes IV at Risa Hontiveros sa pangunguna ng paninira kay ex-P-GMA para lamang matuwa si ex-P-Noy, na prinsipe ng dilawan. Akala ni Cayetano kapag minura niya nang husto si ex-P-GMA ay kukunin siya bilang bise-presidente ng dilawan, pero inayawan din siya ni ex-P-Noy at si VP Leni Robredo ang kinuha bilang kandidato noong 2016 Presidential Elections.
Sa pagkadesperado niyang maging bise ay tumakbo sa Davao si Cayetano at nagmakaawa sa noon ay mayor ng Davao City na si Pangulong Duterte na siya ang kuning kandidato bilang bise-presidente.
Hindi natin alam kung bakit pumayag si Pangulong Duterte na kunin si Cayetano. Ang sabi ng iba, malaki raw ang pondo nito sa kampanya. Maaaring naawa lang siya dahil wala nang pumapansin dito.
Anuman ang rason, sigurado tayong nagsisisi na si Pangulong Duterte kung bakit si Cayetano ang kanyang sinuportahan bilang bise-presidente. Nahati ang boto ng mga pro-Duterte at karamihan ay kay “Bongbong” Marcos pa rin bumoto.
Malinaw ngayon mula nang manalo si Pangulong Duterte na nalinlang ang mga Pilipino sa iskrip ng dilawan na “black versus white”.
Bawat kaaway nila sa politika, mula kay ex-P-Marcos hanggang kay ex-P-GMA at ngayon si Pangulong Duterte, sinisiraan at pinalalabas nilang masama para sila ang magmukhang “anghel”.
Paano magiging anghel ang dilawan, gayung kaliwa’t kanan ang mga isyu noong sila ang nasa poder tulad ng pagkamatay ng mga Pilipino sa Mamasapano masaker, Manila hostage crisis, isyu sa “Yolanda” funds, palpak na bakuna (Dengvaxia), korupsiyon sa iligal na droga at marami pang ibang kawalanghiyaan?
Sa mga kongresistang boboto, isipin ninyong mabuti: Sino ang kandidato sa pagka-Speaker ang magiging “unifying force” para sa Kongreso?
Sino ang may magandang karakter ng katapatan, integridad, talino at pagkamaginoo? Siya ang nararapat na susunod na Speaker ng House of Representatives.
Comments