Mandato ng COA na talupan ang mga ginagastos ng mga taong-gobyerno, period!
- BULGAR
- Jun 9, 2019
- 2 min read
DAPAT “DUGYOT PARTYLIST” ANG BINUO NI CARDEMA — Sa kabila na 33 anyos na si ex-National Youth Commission (NYC) Chairman Ronald Cardema na ibig sabihin, lampas na ang edad niya para maging representante ng youth partylist kung saan nakasaad sa batas na ang edad ng kinatawan ng kabataan ay hindi bababa sa 25 at hindi hihigit sa 30, pinagpipilitan pa rin niya (Cardema) na siya raw ang dapat maging congressman ng Duterte Youth Partylist.
Gustung-gusto niyang maging congressman, eh, ‘di sana, “dugyot partylist” ang binuo niya kasi mas bagay ito sa kanyang edad at hindi ang Duterte Youth Partylist, boom!
◘◘◘
MANDATO NG COA NA SIYASATIN ANG KABAN NG BAYAN KUNG WASTO ITONG NAGAGAMIT O HINDI — Ang mandato ng Commission on Audit (COA) ay siyasatin ang pera ng bayan na mga nasa tanggapan ng pamahalaan upang masigurong wasto ang paggasta ng mga taong-gobyerno sa kaban ng bayan.
Kaya ang sinabi ni P-Duterte na hayaan na lang ng COA ang P5 million Marawi rehab fund na ginamit ng ilang Muslim sa pagdalo sa pilgrimage sa Mecca ay hindi tama kasi kung hahayaan lang ng COA ang maling paggamit sa pera ng bayan ay tiyak magpipiyesta ang mga “buwaya” sa pagnanakaw sa kaban ng bayan, period!
◘◘◘
DATING BIG BOSS NG BuCor, UTUS-UTUSAN LANG NG PRESO — Sa pagtestigo ni dating Bureau of Correction (BuCor) Director Rafael Ragos sa korte ay sinabi niyang inutusan daw siya ng presong si “Hans Tan” na mag-deliver ng drug money kay dating DOJ secretary at ngayon ay detenidong Sen. Leila de Lima.
Ganu’n? Ang dating big boss ng BuCor, ginawang utus-utusan lang ng preso sa Bilibid? Buwisit!
◘◘◘
EX-BuCor CHIEF RAGOS, DAPAT GAWING PRINCIPAL SUSPECT SA KALAKARAN NG ILIGAL NA DROGA SA BILIBID — Kung totoo man ang sinabi ni Ragos na ginagawa siyang utusan ng preso, hindi ito dapat gawing state-witness ng gobyerno.
Mas dapat siyang isama sa mga principal suspect na sangkot sa kalakaran ng iligal na droga sa Bilibid kasi bilang big boss ng BuCor, dapat siya ang nagsasawata ng mga maling gawain sa piitan at hindi nagpapaalila sa mga presong drug lord, period!
Comments