Bisikleta ninakaw, huli sa CCTV | TRIKE DRIVER TINARAKAN SA LEEG, UTAS

ISANG tricycle driver ang pinagsasaksak habang ito ay natutulog sa loob ng kanyang ipinapasadang tricycle sa Mandaue City, gabi ng Biyernes.

Agad binawian ng buhay sanhi ng tatlong tama ng saksak sa leeg at kilikili ang biktima na si Dale Abayon, 37.

Kusang-loob namang sumuko ang suspek na sinasabing kilala ng biktima. Batay sa imbestigasyon, naganap ang krimen sa Bgy. Cabangcalan, alas-11:00 ng gabi habang natutulog si Abayon sa kanyang tricycle.

Kinaumagahan, ang mismong suspek umano ang nagtungo sa himpilan ng pulisya at kanyang ini-report ang ginawa nitong krimen.

Naiwan pang nakatarak ang kutsilyo sa leeg ng biktima nang madatnan ng mga pulis.

Sa pahayag ng suspek, sinadya niyang patayin ang biktima sa sobrang galit nito dahil ninakaw umano ni Abayon ang kanyang bisikleta.

Nalaman niyang si Abayon umano ang nagnakaw sa bisikleta nito base na rin sa kuha ng CCTV sa lugar.

Kasong murder ang kinahaharap ng suspek kaugnay sa krimen.