MRT at LRT nagkaaberya

PINABABA ang nasa 850 pasahero ng MRT-3 matapos magkaaberya ang tren sa Boni Station northbound pasado alas-5:00 ng hapon, kahapon.

Ayon sa pamunuan ng MRT, electrical failure sa motor ang sanhi ng aberya. Sumakay naman sa kasunod na tren ang mga pasahero na dumating 7 minuto matapos silang pababain.

Samantala, nakaranas din ng aberya sa biyahe ng line 2 ng LRT. Pasado alas-10:00 ng umaga kahapon nang mag-tweet ang LRT-2 na suspendido muna ang operasyon ng kanilang mga tren dahil sa technical problem.

Alas-9:54 ng umaga nang ideklara ang code red sa LRT-2. Wala namang partikular na dahilan na binanggit ang pamunuan ng LRT-2 sa nangyaring aberya pero, ang problema ay sa bahagi ng Cubao Station.

Dahil sa nasabing aberya, pinababa ang mga pasahero na nasa platform na ng LRT-2.

Sa bahagi ng Katipunan Station, pinababa ang mga pasahero at inabisuhan silang suspendido ang operasyon.