Next Speaker mahirap matukoy, bilog ang bola

KA AMBO / BISTADO

DININIG ng Malacañang ang paulit-ulit na pakiusap natin na linawin ang pahayag kaugnay sa Speakership sa Kamara.

Binigyan-diin nina P-Di­gong at Mayor Sara na wala silang iniendorso.

Klap! Klap! Klap!

◘◘◘

GAYUNMAN, kahit hindi makialam ang mag-amang Duterte, pinanini­walaang susuportahan ng mga kongresista kung sino ang nakadikit sa kanilang dalawa.

Dahil d’yan, nauuwi na lang sa dalawang aspirante ang tunay na magbabak­bakan sa Speakership.

Sinasabing maggigirian sina Rep. Lord Allan Velasco at Rep. Alan Peter Cayeta­no.

Sige, bigyan ng gloves ‘yan!

◘◘◘

PDP-Laban ang susu­porta kay Velasco, saman­talang, si Cayetano ay iniendorso ng National Unity Party at NP.

Nawala sa eksena si Rep. Martin Romualdez dahil kakarampot naman ang miyembro ng kanyang partidong Lakas-CMD!

◘◘◘

HINDI pa umaatras si dating Speaker Pantaleon Alvarez na aagaw ng boto mula sa PDP-Laban dahil siya ang iniendorso naman ni Sen. Koko Pimentel.

Iniuulat na may 126 kongresista ang suporta­do kay Romualdez, pero pinagdududahan ito dahil isinama rito ang grupo ng Hugpong ng Pagbabago ni Mayor Sara!

◘◘◘

KAHIT ang pinsan ni Romualdez na si Senator-elect Imee Marcos ay nagdududa sa kanyang tsansa kasi kakaunti lang ang miyembro ng Lakas-CMD.

Nilinaw ni Marcos na ang magiging Speaker daw ay ang aspirante na nakadikit kay P-Digong, lalo na kung ito ay iiendorso ng pangulo.

Mahalagang dikit kay P-Digong dahil ang Spea­ker ay siyang mag­mama­niobra ng Legislative agenda ng Malacañang!

◘◘◘

BILOG ang bola kaya mahirap matukoy kung sino ang magiging Speaker sa kabila ng ulat na naghayag ng paglipat sa NUP ang ilang miyembro ng Lakas at PDP-Laban.

May ulat din na nagpapapirma na ng manifesto ang isang aspirante, pero walang numero na pinalulutang.

Nakatunganga ngayon ang sambayanang Pinoy kung sino ang magiging Speaker: Ang nagyayabang na panalo na siya o ang tameme na aspiranteng lihim na nagmamaniobra?

He-he-he!