SBP 3X3 WOMEN’S TOURNEY: PINALALAKAS ANG 21 TEAM

TAGUMPAY ang muling pagdaraos ng SBP-Smart 3x3 Women’s Tournament noong nakaraang Sabado sa Meralco Orange Fit Center sa Ortigas, Pasig City.

May 21 mga koponan ang sumali at hinati sa limang pools kung saan naglaro sila ng tig-4 na elimination games at ang mga top-seeded teams ay umusad sa semifinals.

Sa pagkakataong ito ay mas marami ang school-based teams na lumahok kumpara sa naunang pagdaraos ng torneo kabilang na ang Centro Escolar University, Far Eastern University at Diliman Preparatory School.

Dinomina ang kompetisyon ng Gilas 1, Gilas 2, NU 1 at NU 2 squads na nanguna sa kani-kanilang kinabibilangang grupo.

“Natutuwa ako sa enthusiastic turnout of the players. Marami ‘yung school-based who represented the sport which is important. Not only are we holding the competition for its sake, but we want to raise the bar in terms of elite competition. We plan on this to be a regular tournament for these up-and-coming players,” pahayag ni SBP 3x3 program director Ronnie Magsanoc. “Kailangan tuloy-tuloy ‘yung nilalaruan nila para makita rin nila na mayroon silang malalaruan na regular. It’s laying down the avenue for them to play consistently and regularly against elite teams,” dagdag nito. (VA)