Panawagan sa mga magulang; gadgets at alahas, huwag ipadala sa mga anak ngayong pasukan!
SIMULA na ng klase, kaya sunud-sunod na rin ang paalala ng Philippine National Police (PNP) hinggil sa seguridad ng mga estudyante.
Bagama’t, nakabantay ang kapulisan sa iba’t ibang paaralan, kailangan pa rin ng mga mag-aaral na bantayan ang kanilang mga gamit at sarili.
Ito ay dahil hindi natin alam kung kailan at sino ang gagawa ng masama ngayong nagkalat na naman ang mga kawatan na nananamantala kung kailan abala ang lahat dahil sa pasukan.
Gayunman, para sa mga magulang, huwag ng magdala at pagdalhin ang mga anak ng mga mamahaling gadget at pagsuotin ng mga alahas sa eskuwelahan upang hindi maakit ang masasamang-loob.
Siguraduhin din na agad na masusundo ang mga anak, partikular ‘yung mga nasa pre-school at elementarya dahil sila ang madalas na tina-target ng mga Budul-Budol Gang.
Dagdag pa rito, mag-ingat din sa mga modus na laglag-barya at salisi sa mga lansangan at pampublikong transportasyon.
‘Ika nga, kung marunong tayong makinig tiyak na maaagapan natin ang anumang panganib na gawa ng mga taong kumakapit sa patalim dahil sa hirap ng buhay.
Gayundin, sa tulong ng PNP, sana, matuldukan na ang mga ganitong kalakaran dahil wala itong naibibigay na magandang epekto sa lipunan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments