MALIKSI AT STEPHESON, PINALALAKAS ANG ELITE

BUMANGON agad mula sa pagkakadapa ang Blackwater Elite matapos lunurin ang Rain or Shine Elasto Painters, 98-92 kagabi sa 2019 PBA Commissioner’s Cup sa Ynares Center, Antipolo City.

Kumana si Allein Maliksi ng 19 points habang nangalabaw si import Alexander Stepheson ng 13 markers at 20 rebounds upang ilista ang 4-1 karta para sa Elite.

Bago nasilo ang panalo, yumuko ang Blackwater sa Phoenix Fuel Masters, 98-103 noong Biyernes sa Mall of Asia Arena sa Pasay City.

Halos makontrol ng Elite ang laro sa unang dalawang periods, nahawakan nila ang 52-40 bentahe sa halftime.

Hindi nagpabaya ang Blackwater sa second half kaya nakuha nila ang panalo.

Samantala, naniniwala si Joe Devance na sasakto ang laro ng kanyang kaibigan na si Jared Dillinger sa Barangay Ginebra.

Pumirma si Dillinger ng kontrata sa Ginebra matapos siyang ilagay ng Meralco sa unrestricted free agent list. “I’m sure he’s gonna come here and display that ‘Never Say Die’ spirit,” sabi ni Devance matapos ang panalo ng Ginebra sa NorthPort noong Sabado sa Mall of Asia Arena. “And that’s his game actually. He plays hard, he plays with heart so he’ll do well.”

Subalit wala pang kasiguruhan kung kailan makalalaro si Dillinger sa Ginebra dahil nagpapagaling pa siya ng kanyang injury. Limang beses lang nakalaro si Dillinger sa Bolts ng nakaraang conference.

Inilagay ng Meralco si Dillinger sa unrestricted list matapos makuha ng Bolts si center Raymond Almazan sa isang trade sa Rain or Shine. “It was right after practice when we heard about it so it was shocking,” saad ni Devance. “I’m not sure what happened and how we got him but it will be a good thing once he gets to play with us.” (ATD)

Mga laro sa Miyerkules: (Araneta Coliseum)

4:30 p.m. - Magnolia vs Alaska: 7:00 p.m. - San Miguel vs NorthPort