PINOY BOXERS, HANDANG BUMANAT SA SEA GAMES

NANINIWALA ang secretary general ng Association of Boxing Alliance in the Philippines (ABAP) na magwawagi ang kanilang boxers na isasabak sa 2019 Southeast Asian Games.

“Honestly and frankly, I don’t cultivate the habit of making prediction. I can assure you they will deliver especially the SEA Games that will be held in our country. They will be inspired and determined to win to please their countrymen,” ayon kay Ed Picson hinggil sa medalyang pananalunin dahil hindi niya nakagawian ang magbigay ng prediction sa kanyang pagbisita sa TOPS Usapang Sports.

Aniya, ang kanilang boxers ay hasang-hasa, battle-tested at kayang makapagpatumba ng karibal sa ibabaw ng ring. Dahil sa marami pang foreign invitations, ilalahad ni Picson ang opisyal na line up sa boxing sa huling linggo ng Setyembre matapos ang lahat ng mga torneo sa labas.

“We will finish first our international commitment before announcing the official line-up,” sambit ng dating PBA sportscaster turned boxing official.

“Sasalain namin nang husto ang kanilang performance at credentials bago ilahad ang mga pangalang lalahok sa SEA Games to ensure victory. Ayaw naming malagay sa alanganin lalo na rito sa atin gagawin ang SEA Games at kailangan naming i-preserve ang winning tradition,” ani Picson.

Kasama sa pinagpipilian sina Carlo Paalam, Rogen Ladon, Eumir Felix Marcial, Ian Clark Bautista, Mario Fernandez, James Palicte, Nesthy Petecio at Josie Gabuco.

Nasa India ang ABAP boxers para sa apat na araw na training bilang paghahanda sa King’s Cup Boxing Tournament na gagawin sa Bangkok, Thailand.

Ang boxing ay kasama sa mahigit 10 combat sports sa 30th SEA Games na pang-apat na beses nang gagawin sa ‘Pinas mula 1981 na huling nilaro sa Malaysia noong 2017.