Bus vs. kotse, 2 dedbol

PATAY ang dalawa katao sa salpukan ng pampasaherong bus at kotse sa Quimpo Boulevard sa Davao City, kahapon ng madaling-araw.

Kinilala ang mga nasawi na sina Melody Sotelo Ybañez, 27, at kanyang kasama na si Janilou Faye Rosales, 21.

Batay sa inisyal na imbestigasyon, binabagtas ng mga biktima ang nasabing lansangan nang mag-counterflow sa linya ng bus.

Nabulaga umano ang mga sakay ng kotse sa papalapit na bus.

Dahil kapwa mabilis umano ang pagpapatakbo ng dalawang sasakyan, hindi na nakaiwas ang mga ito sa salpukan.

Napag-alamang papuntang terminal ang bus habang ang kotse ay papuntang MacArthur Highway.

Patuloy nang sinisiyasat ng mga awtoridad ang insidente habang nasa kustodiya na ng pulisya ang drayber ng bus.