TSANSA SA SEAG, LILINAWIN NI WEIGHTLIFTER DIAZ SA TOPS

STAR-STUDDED na naman ang araw na ito ng Huwebes dahil si Rio Olympics silver medalist Hidilyn Diaz ang bisita sa 24th “Usapang Sports” ng Tabloids Organization in Philippine Sports (TOPS) sa National Press Club sa Intramuros.

Nakagawa ng kasaysayan si Diaz, nang masungkit ang silver medal sa weightlifting noong 2016 Olympics sa Rio de Janeiro, at tatalakayin ang hinggil sa sport na kanyang paborito sa 10 a.m. public service program ng Philippine Sports Commission, National Press Club at PAGCOR.

Ang historic silver-medal finish ni Diaz sa women’s 53 kg category sa weightlifting ang tumuldok sa 20-year medal drought ng bansa sa Olympics. Mainstay ng Philippine Air Force mula 2013, magsasalita ang 28-anyos na si Diaz hinggil sa tsansa ng bansa sa 30th SEA Games at maging sa kanyang programa na makatulong sa weightlifting ng bansa. Panauhin din sa forum na nakaangkla sa Facebook live via Glitter Livestream ang Philippine Olympic Committee (POC) officials.

Itinalaga ni POC President Ricky Vargas ang bagong POC chairman na si Rep. Abraham “Bambol” Tolentino kapalit ni Joey Romasanta bilang CDM sa Tokyo Olympics at si Philippine Sports Commission (PSC) head William “Butch” Ramirez na ipinalit kay Monsour Del Rosario. Si Lucas Managuelod ng Muay Thai ang bagong membership committee head na ipinalit kay Robert Bachmann.