Kaalaman tungkol sa diabetic retinopathy

SHANE M. LUDOVICE, M.D / SABI NI DOC

Dear Doc. Shane,

Kasama naming naninirahan ang aming tiyahin na mayroong diabetes. Bagama’t, mayroon siyang maintenance, hindi pa rin niya maiwasang kumain ng matatamis na pagkain dahil siya ay pastry chef sa aming bake­shop. Dahil dito ay nagkaproblema na rin siya sa kanyang mga mata. Sinabihan siya ng doktor na mayroon daw siyang diabetic retinopathy. Ano ba ang dapat gawin para maagapan ito? — Isabel

Sagot

Ang diabetic retino­pathy ay kumplikasyon ng diabetes sa mga mata. Sinisira ng diabetes ang mga ugat ng retina kaya lumalabo ang paningin hanggang sa mabulag. Minsan, may nakikita ring floaters o mga itim na spot na lumulutang-lutang sa paningin. Mas mataas ang posibilidad na magkaroon ng diabetic retinopathy kung mas matagal nang may diabetes, lalo na kung hindi kontrolado ang asukal sa dugo. Mas maiiwa­san ang retinopathy kung maayos ang blood pressure at cholesterol.

Narito ang dala­wang klase ng diabetic retinopathy:

Non-proliferative diabetic retinopathy — ang mga ugat sa reti­na ay numinipis at nag­ka­ka­roon ng micro­aneu­rysms (paglobo ng ding­ding ng ugat). Buma­bara rin ang mga ugat at lu­malaki ang bahagi ng ugat na lagpas sa pagka­bara. Minsan, tumatagas ang dugo at protina sa mga ugat ng retina. Ang resulta ay ang panlalabo ng paningin.

Proliferative diabetic retinopathy — ang mas malalang klase ng retinopathy. Sa sobrang pagbara ng mga ugat sa retina ay nagka­karoon ng mga bagong maliliit na ugat. Puwe­deng pumutok ang mga maliliit na ugat na ito at kapag dumugo ito ay nakakikita na ng floaters o maliliit na spots sa paningin. Nagkakaroon ng peklat ang retina dahil sa mga baradong ugat at nahihila nito ang retina kaya umaangat ito sa pagkadikit sa likod ng mga mata. Ito ang tinatawag na retinal detachment at puwedeng mabulag dahil dito. Gayundin, puwedeng magkaroon ng glaucoma (mataas na pres­yon sa mga mata) kung ang mga bagong ugat ay humaharang sa pag-ikot ng tubig sa loob ng mga mata kaya delikado ang proliferative diabetic retinopathy.

Depende sa proble­ma sa retina, ang ophthalmologist ay maaa­ring magrekomenda ng mga sumusunod:

Focal laser treatment o photocoagulation — sinusunog ng laser ang mga dugo na tumatagas sa mga maninipis na ugat ng retina.

Scatter laser treatment o panretinal photocoagulation — ang laser ay itinutuon sa buong retina para sunu­gin ang mga maliliit na bagong ugat upang matanggal ang mga ito. Ilang sessions din ang kailangan para ma-laser ang buong retina.

Vitrectomy — ang eyeball ay may clear gel sa loob nito na tina­tawag na vitreous humor. Dito tumatagas ang dugo kapag may pumu­tok na ugat sa mga mata. Ang vitrectomy ay operasyon na kailangan ng local o general anesthesia kung saan tinatanggal ang dugo sa vitreous humor.

Mahalagang mag­patingin sa doktor sa mata ang may Type 2 diabetes sa unang pag­kakataong nalamang may diabetes at kada taon pagkatapos nito. Ang mga may Type 1 diabetes ay dapat namang magpatingin ng retina sa loob ng limang taon pagkatapos mapag-alaman na may diabetes.