Gapangan sa House Speakership | P1 MILYON KADA CONG.

AABOT umano hang­gang P1 milyon ang bayad sa bawat kongresista para makopo ng nag-aam­bisyong House Speaker ang posis­yon.

Ibinunyag ito ni Davao del Norte Rep. Pantaleon Alvarez kasabay naman ng umano’y pagkalat ng text messages tungkol sa imbi­tas­yon ng isa sa mga nakiki­pag­kumpitensiya para ma­sung­kit ang liderato ng Ma­babang Kapulungan.

Sinabi ni Alvarez na nag­simula na ang matinding gapangan bagama’t, sa Hulyo 22 pa ang pagpapalit ng mga lider bilang pam­bungad sa pagbubukas ng ika-18 Kongreso.

Ang bawat kongresista na mangangako na boboto ay tatanggap umano ng P500,000 at ang balanse ay ibibigay kapag nakuha na ang House Speakership.

Dismayado si Alvarez na may vote-buying sa Ka­mara na maaaring maglagay sa kompromiso ng integridad ng nasabing posisyon.

Gayunman, tumanggi si Alvarez na tukuyin ang kan­didato sa pagka-Speaker na gumawa ng umano’y panu­nuhol.

Kabilang sa maugong ngayong maglalabanan sa Speakership ay sina Rep. Lord Allan Velasco, Rep. Martin Romualdez, Rep. Alvarez at incoming Rep. Allan Peter Cayetano.

Samantala, kumalat na­man ang text messages mula umano sa tanggapan ni Rep. Velasco na nag-iimbita sa ilang kongresista na magtu­ngo sa isang gusali sa Pasig City sa Lunes para pag-usa­pan ang ilang mahahalagang bagay.

Umugong din sa Kamara ang umano’y pag-aalok ng P1 milyon sa bawat mamba­batas na popondohan ng kila­lang malapit kay Velasco na si San Miguel Corp. Presi­dent Ramon Ang.

Sinubukan ng BUL­GAR na makaugnayan si Velasco sa nasabing usapin ngunit, wala pang tugon ha­bang isinusulat ang balitang ito. Si Velasco umano ang gustong suportahan ni Da­vao City Mayor Sarah Du­terte sa House Speakership ngunit, nauna na ring sinabi ng alkalde na hindi maki­ki­alam sa usapin.