ROTC, malaki ang maitutulong sa mga kabataang naliligaw ng landas

RYAN B. SISON / BOSES

MATAPOS ang ilang pagtatalo, ina­prubahan na ang pagsasagawa ng Re­serve Officers’ Training Corps (ROTC) sa senior high school kung saan tinutulan ito ng Akbayan Youth dahil magdudulot lang umano ito ng karahasan at pang-aabuso sa kaba­taan.

Sa totoo lang, para sa atin, tama lang ang pag-apruba sa ROTC dahil bukod sa malilinang ang kaalaman ng kabataan hinggil sa paraan kung pa­ano hinahasa ang mga militar na malaki ang tungkulin sa bansa, makatutulong din ito sa kanila upang maging res­ponsable at disiplinado silang mama­mayan.

Sa ngayon, maraming kabataan ang naliligaw ng landas, dagdag pa na mas­yado na silang kinakain ng sistema ng teknolohiya at nakalilimutan na nilang tumulong sa lipunan.

Gayunman, aminin man natin o hin­di, marami sa Pilipino na nakaranas ng ROTC noon ang sinasabing malaki ang epekto ng training sa ka­nilang pagkatao sa kasalukuyan kung saan ka­hit sa maliit na paraan ay naga­mit nila ang mga natutunan nila rito.

Samantala, ang nasabing aktibidad ay magpapanatili rin ng nationalism at patriotism para sa kabataan, kaya ma­ganda na habang bata pa sila ay kanila na itong maranasan.

Gayundin, ang ROTC ay hindi gi­na­gawa para lamang pahirapan ang mga estudyante kundi para matuto silang magkaroon ng kontrol at limitasyon sa kanilang mga gusto.

Kaya ang hiling natin sa lahat, par­tikular sa mga estudyanteng maka­ra­ranas ng ROTC, seryosohin ninyo ito upang hindi masayang ang mga aral na maaari ninyong matutunan.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.