Seaman at kasamang babae, dinukot | 7 KIDNAPPERS, ARESTADO

NADAKMA ang pi­tong miyembro ng kidnap-for-ransom matapos ma­ka­takas ang isa sa mga bik­tima at nakapagsumbong sa aw­toridad kaya nagsa­gawa ng follow-up operation at nasu­kol ang mga suspek sa Bgy. Anabu 1D, Imus, Cavite.

Kinilala ni Police Lieute­nant Colonel Francisco Jarcia Lucena III, ang mga suspek na sina Floyd Ordoñez , 36; Arwin Varrios, 35; Allan Sun­diam, 39; Mark Angel Andamon, 27; Princess Sar­miento, 23; Princess Joy Po­ras, 19, at Jackielou Bernal, 38.

Ayon sa pulisya, naka­tanggap sila ng tawag mula sa mga opisyal ng Bgy. Ana­bu 1D na may babae umano sa kanila na nag-re­port na kinidnap ito at ang isa pang kasama.

Magkasama ang mga biktimang sina Sherwin Al­len Legaspi, 25, seaman at Patricia Dante, 19, nang bigla na lamang umano si­lang di­kitan ng mga suspek at sa­pilitang isinama.

Dinala ang mga biktima sa safehouse sa Bgy. Anabu 1D, Imus at dito iginapos.

Kinausap ng mga sus­­pek ang mga biktima at sinabing kailangan nila ng P40,000 kaya tinawagan ang magu­lang ni Sherwin upang hingin ang nasabing halaga.

Sinabihan din ito na hu­wag magsusumbong kahit kanino upang hindi saktan o patayin ang mga biktima.

Habang hinihintay ng mga suspek ang ransom mo­ney mula sa pamilya ng bik­timang seaman, nakatulog umano ang mga ito kaya si­namantala ito ni Patricia at tumakbo palabas saka du­mi­retso sa barangay hall.

Tumawag sa pulisya ang mga barangay official at iki­nasa ang operasyon.

Nagsanib-puwersa ang PCP3 at SWAT at lumusob sa safehouse ng mga suspek at dito nadatnan ang pitong lalaki na hindi na nakuha pang manlaban at naroon din ang biktimang seaman.

Narekober mula sa mga ito ang baril, magazine, mga bala, 8 sachets ng marijuana, 3 sachets ng shabu, water pipe at 9 cellphones.