200,000 boto hinihintay pa — Comelec | PROKLAMASYON, ‘DI NATULOY

HINDI natuloy ang ina­asahang proklamasyon ng mga nanalong senador at partylist kahapon.

Ayon kay Commission on Elections (Comelec) Spokesperson James Jime­nez, ito ay dahil sa hindi pa naka-canvass na Certificate of Canvass (COC) mula sa Washington DC sa Estados Unidos.

Ani Jimenez, iaanunsiyo na lamang nila kung kailan ida­raos ang proklamasyon ngu­nit, posibleng maisagawa aniya ito ngayong araw o bu­kas.

Mahalaga aniyang ma­isama ang naturang COC na may mahigit 200,000 voters, sa canvassing bago ang prok­lamasyon upang matiyak na wala nang paggalaw na ma­gaganap sa rankings ng mga elected senator.

Tinatangka naman aniya nilang makipag-ugnayan sa Washington DC ngunit, ang naging problema ay hating­gabi pa sa Estados Unidos kaya hindi nila ito makontak.

Posible aniyang matang­gap at mai-transmit ang na­turang hinihintay na COC pagsapit ng alas-8:00 ng gabi ng Martes dito sa Pilipinas na agad isasalang sa canvas­sing ng National Board of Canvassers (NBOC).

Alas-10:25 ng umaga nang muling magsesyon ang NBOC at binilang ang mga boto mula sa Kingdom of Saudi Arabia.

Batay sa partial at offi­cial results ng Comelec, nananatili pa rin sa Magic 12 sina Cynthia Villar, Grace Poe, ‘Bong’ Go, Pia Caye­ta­no, ‘Bato’ dela Rosa, Sonny An­gara, Lito Lapid, Imee Mar­cos, Francis Tolentino, Koko Pimental, ‘Bong’ Re­villa at Nancy Binay, habang patu­loy na humahabol sina JV Ejercito at Bam Aquino.

Sa partylist groups na­man, matatag pa rin sa unang puwesto ang ACT-CIS na ma­higit 1.5 milyong boto ang lamang sa mga sumusunod na grupo na Bayan Muna, Ako Bicol, Cibac, Ang Pro­binsiyano, 1Pacman, Ma­rino, Probinsiyano Ako, Se­ñior Citizens at Magsasaka.