Mga kandidatong sangkot sa vote-buying, lagot!
BALAK ng Philippine National Police (PNP) na magkaroon ng investigating body na siyang tututok sa mga indibidwal at pulitikong sangkot sa vote-buying cases, ito ay kasunod ng kaliwa’t kanang report na halos hindi naaksiyunan ng kapulisan noong nagdaang halalan.
Sa ngayon, ang mga nahuhuli lamang na may kinalaman sa vote-buying ay ‘yung mga nautusang mamili ng boto at hindi ‘yung mga pasimuno at financier na pulitiko.
Gayunman, sa nagdaang halalan, naging seryoso umano ang kampanya kontra vote-buying, pero marami pa rin ang nakalusot.
Kaya sana sa mga eleksiyon pang magaganap ay magsilbing-aral ito hindi lamang sa mga may kapangyarihan kundi maging sa mga botanteng nagpasilaw sa pera kapalit ng kanilang karapatan.
Sa totoo lang, hindi biro ang 12 milyong halaga na nakumpiska dahil kung tutuusin ay kaya na nitong makatulong sa mga mahihirap sa magandang pamamaraan.
Samantala, bagama’t, nakatulong ang voter’s education sa aktibong pagre-report ng mga insidente ng vote-buying, kailangan pa rin itong pag-ibayuhin nang sa gayun ay tuluyan nang talikuran ng mga botante ang vote-buying.
Tandaan, ang pera nauubos ‘yan, pero ang karapatan, mahirap kapag nawala ‘yan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments