KBA STARS BINOKYA ANG RTU IX,16-0 SA PBL

HUMATAW ng buwenamanong panalo ang Katayama Baseball Academy (KBA) Stars matapos nitong blangkuhin ang Rizal Technological University (RTU), 16-0, via mercy rule sa pagbubukas ng Philippine Baseball League (PBL) sa Rizal Memorial Baseball Stadium sa Maynila nitong nakaraang weekend.

Nagpasiklab ang mga Katayama pitchers na sina dating La Salle star Carlos Muñoz, Francis Geismundo at Lesmar Ventura upang ‘di papormahin ang batang Mandaluyong sluggers para sa isang no hitter abbreviated one-sided victory.

Tinampukan pa ito ng two-run-homerun ni Muñoz sa tuktok ng unang inning na naging hudyat ng masaker sa Malate Diamond. “We had a very good start in the PBL and I’m very happy to have this team with young potential talent,” wika ni KBA team owner/coach Katayama na kaagapay sa bullpen sina coach Joseph Orillana at Jonnard Pareja.

Ang KBA Stars ni baseball patron Katayama-Japanese national na nakabase sa Pilipinas, ay binubuo ng mga collegiate at commercial players, ilang kasalukuyan at dating miyembro ng national team ay bagong tatag na koponang sumabak sa bagong ligang PBL na inorganisa nina Philippine Amateur Baseball Association (PABA) president Chito Loyzaga at secretary-general Pepe Muñoz. (MC)