Edad 70 at 73 sapol sa motor

DALAWA ang patay habang isa ang sugatan sa magkahiwalay na aksidente sa kalsada sa bayan ng Lopez at Calauag, Quezon.

Ayon sa ulat ng Quezon Provincial Police Office (QPPO), naglalakad lamang sa tabi ng kalsada ng Maharlika Highway sa Barangay Vinas, Calauag, ang dalawang lola na sina Estilita de Luna, 70, at Nemia Vejerano, 73, nang mabundol ng motorsiklong minamaneho ni Roy Aferin, alas-9:00 ng gabi ng Sabado.

Naitakbo pa sa Magsaysay Memorial District Hospital (MMDH) ang dalawang matanda sa bayan ng Lopez ngunit, nasawi si Vejerano.

Hawak na ng pulisya ang driver ng motorsiklo na si Aferin na siya ring nag-report sa pulisya kaugnay ng insidente.

Samantala, sa Lopez, Quezon, nasawi rin si Michael Bryan Tabuga, 24, nang mahagip ng UV Express van sa Maharlika Highway sa Barangay Canda Ilaya, alas-9:30 ng gabi.

Sinasabing patungong Bicol ang van at puno ito ng pasahero nang mangyari ang insidente.

Namatay habang ginagamot sa Magsaysay Memorial District Hospital (MMDH) si Tabuga bunsod ng grabeng pinsala na natamo nito sa kanyang katawan.

Sumuko naman ang driver ng van na si Ruel Bisnar sa pulisya at nahaharap sa ilang kaso.