PH ROBOTICS TEAM, CHAMP SA FIRST LEGO LEAGUE WORLD

NAGKAMPEON ang Philippine Robotics National Team makaraang makasungkit ng dalawang prestihiyosong awards sa katatapos na For Inspiration and Recognition of Science and Technology (FIRST) Lego League World Championship na idinaos sa Houston, Texas sa United States.

Ang delegasyon ay binubuo nina DYCI Blue Ocean’s 10 mula sa Dr. Yanga’s Colleges (12-17 age bracket), na siyang nagwagi ng Champion’s Award Finalist at CYLLO ng De La Salle Zobel (6-12 age bracket), na nakakopo ng Explore and Discover Award.

Ang DYCI Blue Ocean’s 10’s na gumawa ng “Project Fuse” ay tinalo ang may 109 teams mula sa 74 mga bansa.

Ang team members ay binubuo nina Jocas Arabella Cruz, Abigail Silva, Denise Carpio, Naiah Nicole Mendoza, Raingel Vryse Mendoza, Rodel Christian Alcantara, Ma. Anne Geline Doneth Dela Rama, Paul Jaren Perez at Lara Monique Narciso.

Pinamumunuan sila nina head coach Beryl Jhan Cruz at assistant coach Lemuel Francisco.

Ang “Project Fuse” ay isang virtual reality game na kumukonekta sa astronauts sa kalawakan para sa kanilang pamilya na naiwan sa mundo sa pamamagitan ng live virtual reality video chat na may physical interaction sa pamamagitan ng robot.

Ang proyekto ay ang group design para sa taon na ito ng “Into Orbit” challenge upang magkaroon ng paraan na maka-solve ng physical at social problems kaugnay ng long-duration space flight. (MC/VA)