Ilang kandidato na sangkot sa iligal na droga, wagi!
BAGAMA’T, nakasama sa listahan ng narco-politicians, wagi pa rin ang 25 kandidato sa nagdaang 2019 Midterm Elections.
Sinabi ni Philippine Drug Enforcement Agency (PDEA) Director General Aaron Aquino na ang mga pulitiko na nanalo ay mula sa CALABARZON, ARMM at Central Luzon.
Nakadidismaya, dahil alam nating inilabas ang narcolist para malaman ng mamamayan kung sinu-sino ang mga dapat at hindi dapat iboto, pero hindi pa rin natauhan ang mga botante.
Gayunman, parang pag-ibig lang ‘yan dahil hindi natin sila puwedeng turuan sa pagpili ng gusto nilang kandidato, ‘yun nga lang, sa huli ay mukhang sisihan na naman.
Pero, sa totoo lang, dahil sa resultang ito, lumalabas na wala ring saysay ang paglalabas ng mga pangalan ng mga kandidatong sangkot sa iligal na droga dahil karamihan sa kanila ay ibinoto pa rin ng taumbayan sa kabila ng hindi magandang reputasyon at maling nagawa sa nakaraan.
Kaya sa panahon na magrereklamo tayo, isipin natin na tayo rin ang pumili sa mga ‘yan para maupo sa puwesto.
Samantala, ipagdasal nalang natin na sana ay tuluyan na silang magbago at tanging paglilingkod sa bayan at mamamayan ang kanilang prayoridad.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments