Tserman at anak-anakan pinagbabaril, bahay sinunog | EX-U.S. MARINE, NALITSON

PATAY sa pakikipag­ba­rilan sa pulisya ang isang retiradong U.S. Marine ilang sandali matapos nitong ma­patay ang kanilang barangay captain at kanyang anak-anakan nang mag-amok ito sa Talisay City, Cebu.

Gayunman, bago pa ma­patay ng mga awtoridad ay nagawa munang silaban ng suspek na si Dean Torre­franca ang kanilang bahay sa Bgy. Lawaan Dos, alas-11:00 ng umaga ng Huwebes.

Base sa imbestigasyon, bago ang pag-aamok ni Tor­refranca ay huli itong naki­tang nakikipagtalo sa anak ng kanyang dating asawa na si Jedd Ybañez sa harap ng kanilang bahay.

Hatian umano sa ari-arian, partikular sa bahay at dala­wang sasakyan ang sina­sabing dahilan ng pagtatalo ng dalawa mula nang pu­manaw si Delia Ybañez Tor­refranca, may isang buwan na ang nakalilipas.

Agad umanong puma­gitna ang kapatid ni Ybañez na si Boboy Omana at nag­kasundong pag-usapan na lamang sa barangay hall ang kanilang hindi pinagkaka­una­waan.

Gayunman, mabilis din namang umalis si Torre­franca sa barangay hall dahil nabigo umano ang dalawa sa kasun­duan.

Dito na nagpasya ang kanilang kapitan na si Jim­my Bartilic na samahan ang magkapatid para magtungo sa kanilang bahay at doon na lamang ipagpatuloy ang pag-uusap subalit, laking-gu­lat na lamang nila nang makitang naka-vest si Torre­franca at may hawak na ba­ril.

Tumakbo palabas ng bahay sina Bartilic at Ybañez subalit, hinabol sila ng sus­pek hanggang sa labas at doon sila pinagbabaril nito.

Matapos ang pamamaril ay bumalik umano si Torre­franca sa bahay at doon nag­kulong hanggang sa rumes­ponde ang pulisya sa pang­yayari.

Nagkaroon umano ng maikling negosasyon para sa pagsuko ni Torrefranca su­balit, maging ang mga pulis ay pinagbabaril nito.

Nagkaroon na umano ng palitan ng putok sa pagitan ng magkabilang panig hang­gang silaban ni Torre­franca ang bahay nito.

Narekober ng pulisya ang sunog na bangkay ni Tor­refranca matapos ang isang oras na shootout.