PACQUIAO VS. THURMAN BAKBAKAN NA SA HULYO

MAGBABALIK aksiyon si Filipino boxing legend Manny “Pacman” Pacquiao sa Hulyo at makahaharap niya ang napakamapanganib na fighter na si Keith “One Time” Thurman.

Inanunsiyo ni Pacman sa kanyang social media accounts kahapon na haharapin niya si unbeaten Thurman (29-0, 1 NC) sa Hulyo 20.

Hawak ng 40-anyos na si Pacman ang unanimous decision victory laban kay Adrien Broner noong Enero kung saan niya nakuha ang unang pagdepensa ng kanyang regular WBA welterweight belt na napag­wagian niya kontra kay Lu­cas Matthysse noong Hulyo 2018.

Huling lumaban si Thur­man noong Enero 2019. Nadepensahan niya ang “super” version ng WBA welterweight belt nang talunin si Josesito Lopez via majority decision. Sa dagdag na ulat ng Philboxing, sa Las Vegas idaraos ang laban pero wala pang pinal na eksaktong venue. Ang press tour ng Pac­man-Thurman ring date ay unang nakatakda ng Mayo 20 sa New York City at Ma­yo 21 sa Los Angeles. Ang Pacquiao training camp ay sisimulan agad matapos ang media tour.

Sa ngayon ay abala pa si Pacman sa araw ng halalan. Sa kabila ng kanyang hectic schedule, nagagawa niyang maglaro ng basketball para manatiling fit at healthy.

“Even when i’m not on training, I play basketball everyday to maintain my speed and stamina. That is to ensure I’m always in good shape,” saad ni Pacquiao.

Matapos ang halalan plano na ni Pacman na mag-light training tulad ng jogging at stretching. “Some members of the training team are actively involved in politics so they will be available after the election. They were busy wooing the voters’ support during the campaign period,” ani Pacquiao.

Aalis ng Manila ang entourage ni Pacman patungong New York sa Mayo 19 para dumalo sa press tour. (VA/MC)