Kahalagahan ng pagkakakilanlan sa mga kandidato para sa halalan

FR. ROBERT P. REYES / KAPAAYAPAAN

DALAWANG araw na lang, halalan na. Kilala na ba talaga natin ang mga kandidato? Gaano kahalagang makilala ang mga kandidato, anu­mang posisyon ang tinatakbuhan nito mula sa pinakamababa hang­gang sa pinakamataas?

Nakalulungkot isiping may mga botan­teng hindi kilala kung sino ang kanilang mga iboboto sa Lu­nes, ika-13 ng Mayo 2019.

Limang araw mula nang inilunsad natin ang ‘8K Diretso’, ang takbo para sagipin ang pagka­tao at kaluluwa ng mga Pilipino. Ilang taon na tayong lumalahok sa eleksiyon, naging baha­gi tayo ng paghalal sa anim na pangulo mula 1986. Napakabata pa natin nang tumakbo sa pinakamataas na posis­yon sa Republika ng Pilipinas si dating Pangulong Ferdinand Marcos noong 1965.

Ngunit, hindi nagta­gal nang tayo ay puma­sok ng seminaryo, na­mu­lat tayo sa mga kalabisan, pang-aabuso at katiwalian ni ex-P-Marcos. Mula noon, hindi natin binitiwan ang ating pananampalataya at pagmamahal natin sa Diyos at Inang Bayan.

Noong 1977, itina­tag ng ilan sa mga semi­narista ang samahang ‘GOMBURZA’ na sumusunod sa motto na, “Kristiyano ako kaya Makabayan.”

Malalim na kaug­nayan ng kalooban, kamalayan, pananaw, pagkatao at kaluluwa sa mga sinasabi at gina­gawa natin. Hindi maa­aring magsalita at gumawa nang walang malalim na pinag-uuga­tan o pinaghuhugutan.

Hindi ba, ito ang ibig sabihin ng Ebanghelyo noong nakaraang Huwe­bes? “Walang makala­lapit sa Akin maliban kung dalhin siya ng Amang nagsugo sa Akin. At ang lalapit sa Akin ay muli kong bubuhayin sa huling araw. Nasusulat sa aklat ng mga propeta, “at lahat sila ay tuturuan ng Diyos.” (Juan 6: 44)

Malalim ang kaug­na­yan ng Diyos sa ating lahat, isipin man natin ito o hindi ngunit, kung mayroon tayong pana­nanampalataya, mag-iiba ang tingin natin sa lahat ng bagay. Lalalim ang pang-unawa natin sa mga bagay na kara­niwang binabalewala ng marami.

Kaya naman, ganu’n na lang kahalaga ang “8K” o ang walong prinsipyo na ating itina­takbo mula noong nakaraang Linggo, ika-5 ng Mayo hanggang bukas. Galing sa ka­loob-looban ng bawat isa ang karangalan, katotohanan, kataru­ngan, katapatan, katapa­ngan, kasarinlan, kaba­baang-loob at kabanalan.

Tingnan natin kung paano bumababaw at nawawalan ng lalim ang kalooban ng tao kung ipinaiiral nito sa kan­yang buhay ang alinman sa mga sumusunod: Kasinungalian, lalo na ang tuwirang pagkakalat ng hindi totoong balita o “fake news; kawalan ng katarungan; paggamit ng kapangyarihan at salapi sa pag-uusig ng mga inosente; kahan­daang mandaya; magna­kaw at pagtakpan ang katiwalian; kaduwagang nagtatago sa pagiging “bully” sa maling pag­gamit ng puwersa at lakas; kawalan ng pag­mamahal sa sariling bayan; kawalan ng pakikinig at kabukasang tumanggap ng puna, tulong at positibong mungkahi at kawalan ng paggalang sa Diyos.

Balikan natin ang mga katanungan sa simula, sino ka, sino ang kandidato mo? Sino tayo, sino ang kandidato natin? Kailangan nating piliin ang mga kandi­datong muling magpa­palalim at bubuo sa bumabaw na kamalayan natin.

Kung pumapayag tayo sa mga bagay na taliwas sa ating pag­katao at pagka-Pilipino, pag-uugaling magas­pang, walang pakunda­ngan sa Inang Bayan. Maaari tayong magluk­sa at magdalamhati sa kamatayan ng ating lahi at bansang ipinaglaban ng ating mga bayani.

Maaari tayong lu­mahok sa hanay ng mga traydor at taksil na tinalikuran kung ano at sino tayo bilang Pili­pino.

Piliin natin nang husto ang kandidatong may talino, lakas at tapang na isama tayo sa paghihilom at muling pagpapatingkad ng ating kaugalian at kalooban.

Piliin natin ang mga kandidatong isasama at bubuuin tayong muli upang ipaglaban ang ating soberanya at kasarinlan laban sa sinuman o anumang bansang nangangahas na sakupin at burahin ang lahat ng nagbibigay-hugis, lalim at kabuuan sa ating lahat.