ELORTA AT TIU, DOMINADO ANG LARO SA ILAGAN CHESS

HINDI napahiya ang mga eksperto nang bansagan nilang pre-tournament favorites sina David Elorta at Sherwin Tiu matapos dominahin ng dalawa ang unang City of Ilagan Chess Festival Blitz sa Ilagan City Sports Complex, Isabela.

Kapwa tumapos sina Elorta, 36-anyos, at Tiu, 28-taong-gulang, na may anim na puntos mula sa pitong salang sa board para okupahan ang unang dalawang puwesto. Si topseed Elorta, isang National Master na may rating na 2461, ang itinanghal na kampeon dahil sa mas mataas na tiebreak points habang 1st runner-up ang naging papel ng 2nd seed na si Tiu (rating: 2280).

Limang panalo, dalawang draws at walang talo ang nakarehistro sa kartada ng kampeon. Kasama sa mga tinuruan ng leksyon sina Stephanie Nicole Ian Casem (round 1), Erickson Marimla (round 2), Jerry Areque (round 3), FIDE Master Narquingden Reyes (round 4) at si Tiu sa penultimate round. Sa hatian ng puntos nauwi ang engkuwentro niya kina Vince Angelo Medina (round 5) at ang 41-anyos na si Allan Cantonjos (round 7).