VEDEJA AT MAYANG CHAMP SA SUMMER RUN

NAGPOSTE sina Leo Nathaniel Vedeja at Raegin Mayang ng ka­ni­lang mga pangkam­peonatong porma upang pangunahan ang men’s at women’s division ayon sa pagkakasunod-sunod sa two-in-one na karerang tinawag na 2019 Pitogo Summer Road Run sa lungsod ng Makati kamakailan.

Malupit na pacing ang pinakawalan ni Ve­deja, 16-anyos na mag-a­aral ng Pineslight School, sa maikli ngunit ma­pang­hamong ruta na may pa­lusong at paahong mga bahagi at kinapalooban ng tatlong laps.

Unang ikot pa lang ng karerang isang color run ay nakadistansiya na ang binatilyo mula sa pinaka­mahigpit na mga kalaban at hindi na nito binitiwan pa ang trangko hang­gang sa mag-isang maka­tawid sa meta.

Nagsumite ang kam­peon ng tiyempong pi­tong minuto at 57.5 se­gundo para sa 2.2 kilo­metrong paglalakbay.

Malayong segunda naman sina David Lance Paez, 12-taong-gulang mula sa Don Bosco Ma­kati (10:40.4) habang ang 60-anyos na si Maximo Dublois (10:57.6) ay pu­mangatlo sa kaganapang idinaos upang gunitain ang pagkakatatag ng dis­trito ng Pitogo at lumikom ng maaring isuporta sa Blessed Pedro Calung­sod.

Sa grupo ng mga kababaihan, naging dikdi­kan ang sagupaan pero hindi nagpakita ng pang­hihina si Mayang, isang kawani ng MyTown, sa mga karibal kaya nakuha ang tiyempong 11:41.9 at ang trono sa karerang isi­naayos ng EMPJR Events Management sa pakiki­pag­tulungan ng pama­halaang lokal ng Pitogo.

Bumuntot sa nagwagi ang 43-anyos na si Evelyn Jayme (11:45.3) saman­talang nasa ‘di kalayuan ang pumangatlong si Sheryl Mae Sanchez (12:19.1) sa paligsahang nagsilbi ring pagdiriwang ng mga momshies na run­ners at lalo pang naging masigla dahil sa photo­booth na ipinoste sa finish line area.