BILLIARD GOLDS SA 30TH SEAG, PIPILITIN NG MGA BATA NI DJANGO

TULAD ng ibang coaches na gustong kunin ang lahat ng medalya sa 30th South­east Asian Games, ganoon din si billiard coach Francisco “Django” Bustamante at ayon sa kanya kung siya ang masusunod pipilitin ng mga Pinoy na kunin ang lahat na ginto para sa katuwaan ng Pinoy billiard fans.

“Lahat ng coaches ‘yan ang nasa isip.Ganoon din ako. Kung ako ang masu­sunod kunin lahat ang ginto at huwag tirhan ang mga kalaban. Hindi nga lang puwede dahil malakas din ang mga kala­ban at kakayanang manalo,” sabi ni Bustamante sa panayam sa kanya habang naglalakad patungo sa kanilang training center sa second floor ng PCSM building.

“Mataas ang morale at inspiradong manalo dahil sa atin gagawin ang SEA Games. Lahat gustong magpakita at mag­pasiklab sa harap ng kanilang mga kaba­bayan na manonood sa kanila. Nasa atin ang lahat na pabor dahil dito gagawin sa atin ang SEA Games,” wika ng dating world cham­pion na tubong Tarlac.

Kasalukuyang nasa elimination pa ang mga aspirants at ayon sa kanya ilalabas ang official line-up bago mag-SEAG.

Ang 30th edition, 11-nation biennial meet ay lalarga sa Nob.30 na tatagal hanggang Dis. 11 sa state-of-the-art New Clark City Sports Complex sa Tarlac City. “Ang wish ko sana manalo muli tulad nang ginawa nila sa da­lawang SEA Games sa Singapore at Malay­sia,” ani Bustamante.

Dinomina ng mga Pinoy ang billiards sa dalawang SEA Games sa Singapore at Ma­laysia sa kabayanihan nina Carlo Biado, Warren Kiamco, Dennis Orcollo at Rubilyn Amit at Chezka Centeno.

Inaasahang mapipili uli sina world cham­pion Biado, Orcollo, Kiamco, Amit at Cente­no at pangunahan muli ang medal campaign ng ‘Pinas.