Dokumento ng mga biktima sa "Oplan Tokhang", pili lang ng OSG?!
NOONG Abril, pinuna ng Korte Suprema ang pagsumite ng Office of the Solicitor General (OSG) ng piling dokumento ng Philippine National Police (PNP) hinggil sa mga biktima sa kampanya ng administrasyon kontra sa iligal na droga. Ang iniutos ng mataas na hukuman ay ang pagsumite ng lahat ng dokumento.
Ang pagsumite ng piling dokumento ay tila paraan para maantala ang imbestigasyon o para maantala na makita ng publiko ang laman ng mga dokumento. Nagpahayag ang Korte Suprema na ang mga dokumento ay walang kinalaman sa “national security”, isa pang idinahilan ng OSG kung bakit hindi ibinigay ang lahat ng dokumento.
Ang akala natin, isa sa mga ipinagmamalaki ng administrasyon ang Freedom of Information? Bakit tila pinipili ng OSG ang mga dokumento hinggil sa “Oplan Tokhang”? Kung noong Abril pa ito iniutos ng mataas na hukuman, ano na ang nangyari, sumunod na ba sila? Bakit ayaw ipakita o isapubliko ang mga dokumentong ‘yan?
Samantala, patuloy pa rin ang madugong kampanya kontra sa iligal na droga kaya paniguradong nadaragdagan lang ang mga dokumentong ‘yan.
◘◘◘
May nakausap tayong may kakilalang doktor sa health center ng malaking siyudad. Idinaraing nila na kulang daw ang mga doktor at nurse sa health center at may mga pagkakataon na sila pa ang nagiging masama sa mata ng mga pasyente. Isipin na lang natin na napakaraming pasyente ang dinadala o pumupunta rito sa loob lamang ng isang araw tapos sobrang kulang ang mga opisyal sa ospital upang maasikaso ang lahat.
Ito ang estado ng kalusugan ng bansa. Kulang ang mga doktor, nurse at iba pa, kulang lahat maging ang pasilidad at kagamitan. Gayunman, hindi lang ang mga health center ng gobyerno ang may kakulangan ng tauhan kundi maging ang mga kilala o mamahaling ospital ay may kakulangan din ng mga opisyal.
Marahil, hindi talaga matapatan ng sahod sa bansa ang kanilang maaaring kitain sa pagtatrabaho sa ibang bansa, lalo na at may mga bansang nagbubukas pa ng maraming trabaho para sa mga nurse.Siguro, kung matatapatan lang sana ang sahod, hindi na kailangang umalis para mangibang-bansa. Nakalulungkot dahil kapag nagpatuloy ito, may matitira pa ba? Sino pa ang magtatrabaho sa industriya ng kalusugan?
Comments