PFF, MULING BUBUHAYIN ANG FOOTBALL LEAGUE

PINUTOL na ng Philip­pine Football Federation (PFF) ang kasunduan nila sa mga tagapangasiwa ng Phi­lippine Premier League (PPL) noong Biyernes.

Dahil dito, natigil ang problema­dong liga pagkata­pos ng dalawang laro lamang noong Abril 27 sa Rizal Me­morial Stadium.

Gumawa agad ng hakbang ang PFF na buhayin muli ang Philippines Football League (PFL), ang liga na tumakbo ng dalawang taon bago ito sinara at pinalitan ng PPL. Magpapatawag ang pre­sidente ng PFF na si Mariano V. Araneta Jr. ng isang pulong ng mga kopo­nan para maka­pagsimula ng bagong liga bago matapos ang kasaluku­yang buwan.

Nakapagtataka na big­lang tumahimik ang PPL at hindi naglabas ng mga laro para sa mga sumunod na araw. Matatandaan na nag­tabla ang Mendiola FC 1991 at Philippine Air Force sa unang laro, 2-2, at sinun­dan ito ng tagumpay ng Kaya F.C.-Iloilo sa Green Archers United, 3-0.

Maliban sa apat na na­banggit na koponan, inaasa­hang pupunta sa pulong ang Ceres Negros at dalawang koponan na biglang umatras sa bisperas ng pagbukas ng PPL, ang Stallion Laguna at Makati.

Ang Ceres ay nag-kam­peon ng dalawang beses sa dalawang taon ng PFL mula 2017 hanggang 2018 habang ang Kaya ang nagkampeon sa unang edisyon ng Copa Paulino Alcantara noong 2018.

Inaasahan na makabu­buo ng liga na may sapat na koponan at dami ng laro para makilala ayon sa mga alitun­tunin ng Asian Football Con­federation (AFC) at FIFA.

Sa ngayon, ang Ceres, Kaya, Green Archers, Stal­lion at Makati ang nabibigyan ng lisensya habang may apli­kasyon ang PAF at Men­diola.

Mahalaga para sa Pilipi­nas na magkaroon ng mata­tag na pambansang liga dahil maliban sa pagtuklas at pag­hubog ng mga talento, ito ang magsisilbing pinto para ma­kasali ang mga kampeon nito sa mga pandaigdigang palaro tulad ng AFC Champions League at AFC Cup. Sa nga­yon, pasok na ang Ceres sa ASEAN Zone semifinals ng 2019 AFC Cup habang na­natiling buhay ang Kaya na samahan sila papasok sa hu­ling araw ng group stages sa darating na linggo.