Worried na nagmumukhang matanda dahil sa dami ng uban

SHANE M. LUDOVICE, M.D / SABI NI DOC

Dear Doc. Shane,

Sa edad kong 32 ay napakarami ko nang puting buhok o uban. Naiilang ako dahil sa palagay ko ay nagmu­muk­ha akong matan­da. Sa totoo lang, dahil sa aking namumuting mga buhok ay naba­ba­wasan ang aking self-confidence. Marami na rin akong sinubukang paraan, ilang beses na akong nagpa­kulay ngunit, bumabalik ang puting buhok at tila mas du­ma­rami pa. Sob­rang pangit talagang ting­nan, ano ba ang sanhi nito? — Gener

Sagot

Sa katotohanan, ang pagputi ng buhok ay hindi maiiwasan habang tayo ay tumatanda. Ka­pag sumapit ang tao sa kalagitnaan ng edad na 30 ang pagkakaroon ng uban ay unti-unti nang nagsisimula. Bahagi ng normal na pisyolohiya ng katawan ng tao ang pagbabago at paghina ng iba’t ibang sistema ka­pag tumatanda. Kasabay sa pagbabagong ito ay ang pagbabago sa kulay ng buhok na kung dati ay itim, kalaunan ay nagiging puti.

Ang karaniwang kulay ng buhok nating mga Pinoy ay itim. Ito ay galing sa pigment na tinatawag na melanin. Bawat hibla ng buhok ay nagtataglay ng melanin, may matingkad na melanin (dark) at mayroon ding hindi gaanong ma­tingkad (light) na melanin. Ang kumbinasyon ng dark at light melanin ang lumilikha ng iba pang kulay ng buhok na makikita sa ibang mga lahi.

Unti-unting nababa­wasan ang melanin ka­pag tumatanda at nagre­resulta ito sa pagputi ng buhok. Aabot ito sa pun­tong tuluyan nang walang matitirang melanin at magiging puti na ang lahat ng hibla.

Kung bakit nangya­yari na nababawasan ang melanin at pumuputi ang buhok ay nananatili pa ring palaisipan sa mga mananaliksik. Ang eksaktong sanhi nito ay hindi pa natutukoy maliban sa koneksiyon nito na may kinalaman sa edad at genetics (genes).

Narito ang ilan sa mga sanhi ng maa­gang pagputi ng mga buhok:

• genes

• hydrogen peroxide

• paninigarilyo

• mataas na bilang ng free radicals sa katawan

• kakulangan sa Vitamin B12

Narito ang ilang mga paraan upang hindi lumala ang pag­puti ng mga buhok:

• Itigil ang panini­garilyo — para sa mga taong naninigarilyo, mas makabubuti na huminto na sa bisyong ito. Malaki ang masa­mang epekto ng mga kemikal na nagmumula sa sigarilyo. Ang maagang pagputi ng buhok ay isa sa mga hindi magandang dulot ng bisyong ito.

• Bigyan ng sapat na Vitamin B12 ang katawan — ang Vitamin B12 ay mahalaga para mapanatili ang malusog na pagtubo ng mga buhok. Ito ay ma­kukuha sa mga produk­tong mula sa hayop tulad ng karne, isda, manok, itlog at gatas.

• Sikapin na mag­ka­roon ng regular na ehersisyo — ang mada­las na pag-eehersisyo ay maganda para sa pang­kalahatang kalusugan ng katawan. Hindi lamang napananatili ang mabu­ting kalusugan kundi napabubuti rin nito ang magandang daloy ng dugo kasama ang anit. Ito ay magreresulta sa maayos na tubo ng buhok at makapipigil sa agad na pagkakaroon ng uban.

• Iwasan ang pag­kain ng junk foods o hindi masusustansi­yang pagkain at labis na pag-inom ng alak — ang labis na pag­konsumo ng mga pag­kaing walang sustansiya ay madaling makatanda ng hitsura. Kaya kung seryoso na magmuk­hang bata, piliin ang tamang pagkain at iwasan ang junk foods.