Pagkumpiska ng mga ipinagbabawal na kagamitan sa paliparan
Dear Chief Acosta,
Nagbakasyon sa aming probinsiya ang aking pinsan dahil piyesta ngayong Mayo. Dahil ilang araw lang ang pinayagang leave sa kanya, nag-eroplano raw siya upang mapabilis ang kanyang biyahe. Gayunman, nang makarating siya ay kinumpiska raw ang kanyang dalang lighter. Nais naming malaman kung maaari bang kumpiskahin ng airport security ang lighter kahit nakalagay naman ito sa loob ng kanyang bagahe? Ang katwiran niya ay hindi siya pamilyar sa ganitong polisiya dahil first time pa lamang niyang makasakay sa eroplano.— Julius
Dear Julius,
Para sa inyong kaalaman, ang inyong katanungan ay tinatalakay sa Republic Act No. 6235 o mas kilala bilang “An Act Prohibiting Certain Acts Inimical to Civil Aviation and for other purposes,” partikular sa Section 3 nito kung saan nakasaad na;
“It shall be unlawful for any person, natural or judicial, to ship, load or carry in any passenger aircraft operating as a public utility within the Philippines, any explosive, flammable, corrosive or poisonous substance or material.” [Binigyang-diin.]
Sang-ayon sa nabanggit na probisyon ng batas, ipinagbabawal ang pagdadala ng mga explosive, flammable, corrosive at poisonous na materyales sa loob ng eroplano at kabilang dito ang lighter. Maaaring kumpiskahin ang nasabing mga kagamitan ng mga itinakdang tauhan sa paliparan o airport security upang mapanatili ang kaligtasan ng mga pasahero sa kabuuan ng kanilang biyahe.
Dahil dito, ang dala-dalang lighter ng iyong pinsan ay maaaring kumpiskahin sapagkat naglalaman ito ng flammable liquid.
Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.
Maraming salamat sa patuloy ninyong pagtitiwala.
Comments