Panawagan sa mamamayan, personality quiz sa social media, tigilan!
NAKATUTUWA naman talagang malaman kung sino ang maaari nating mapangasawa, kailan tayo ikakasal, anong hitsura ng magiging anak natin, kailan tayo yayaman at marami pang iba na ngayon ay madali nang makikita sa social media dahil sa mga “personality quiz” na ginawa ng iba’t ibang application.
‘Yun nga lang, ang tanong, safe ba ito? Hmmm…
Matatandaang, marami nang insidente ang nangyari dahil sa pagnanakaw ng impormasyon na nakukuha sa social media na talagang nakababahala, lalo na at hindi natin alam ang motibo ng masasamang-loob.
Gayunman, sinabi rin ng mga eksperto pagdating sa mga ganitong bagay na kapalit ng nakawiwili at nakaaaliw na mga quiz na ito ay unti-unting nananakaw ng ibang tao ang ating personal information na hindi natin gugustuhin dahil seguridad natin ang nakasalalay dito.
Kaya ang panawagan natin sa lahat na hanggang ngayon ay tinatangkilik pa rin ito, mainam na mag-ingat nang sa gayun ay hindi mapahamak.
Dagdag pa rito, palagi nating tatandaan, kung ano ang mga benepisyong naidudulot ng paggamit ng social media sa ating buhay ay may kapalit din itong panganib kaya dapat tayong maging handa.
‘Ika nga, huwag tayong magpapaloko sa mga bagay na sa una lang masaya, pagkatapos ay maaari ka rin palang saktan, hugot!
Samantala, ang payo natin sa publiko, huwag tayong masyadong magpakain sa sistema ng teknolohiya at kung kayang balansehin, gawin!
Gayundin, mas mabuti nang nag-iingat kaysa magsawalambahala para sa huli, hindi tayo maging kaawa-awa!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments