Mga dilawang kandidato na laglag sa survey, malamang, “nganga” sa eleksiyon
SEN. BAM AQUINO, LAGLAG NA RIN SA LATEST SURVEY — Sa latest survey ng Pulse Asia, ang dating palaging pumapasok sa Top 12 na si re-electionist Sen. Bam Aquino ay bumagsak na sa pang-13.
Natulad siya kay ex-DILG Sec. Mar Roxas na habang papalapit ang eleksiyon ay bumabagsak ang rating sa survey.
Kapag minalas-malas, malamang, ngayong eleksiyon ay walang “dilawang” kandidato ang magiging senador, boom!
◘◘◘
P-DUTERTE, KAKALAMPAGIN NA NAMAN NG MGA MANGGAGAWA SA SABLAY NA PAGBASURA SA ENDO — Ngayong Labor Day ay kakalampagin na naman ng mga manggagawa ang napakong pangako ni P-Duterte noong 2016 Presidential Elections na kapag siya ang nanalong pangulo ay ibabasura na niya ang endo o kontraktuwalisasyon ng mga kumpanya sa mga manggagawa.
‘Yan ang hirap sa mga trapo (traditional politician) na tulad ni P-Duterte, kung anu-ano ang ipinapangako sa mga botante para lang iboto, pero kapag nanalo na, ‘yung pangako, napapako na, buwisit!
◘◘◘
TAAS-PRESYO NG MGA BILIHIN, DAGDAG-TOLL FEE TAPOS NAGKA-OIL PRICE HIKE PA ULIT, SAKLAP — Simula kahapon ay nagtaas na naman ng presyo ng langis ang mga oil company.
Ang itinaas ng gasolina kada litro ay P0.75 sentimos, ang diesel ay P0.80 sentimos at ang kerosene ay P0.90 sentimos.
Hay naku, ang taas na ng presyo ng mga bilihin, ang taas na rin ng singil sa toll fee tapos nagtaas pa ulit ng presyo ng mga produktong petrolyo, saklap!
◘◘◘
RAKET NINA ‘NARDO’ AT ‘EVELYN’, UNTOUCHABLES SA NUEVA ECIJA AT BATAAN — Hanggang ngayon daw ay tuloy pa rin ang raket na drop balls at color games nina “Nardo” sa Cabanatuan City, Nueva Ecija at “Evelyn” sa Dinalupihan, Bataan.
Ibig sabihin, hindi pa pala nakatitikim ng huli mula sa mga awtoridad sina “Nardo” at “Evelyn” kaya tuloy ang panraraket nila sa mga residente ng Cabanatuan City at Dinalupihan.
Dahil hindi pa nato-“tokhang”, lumalabas na untouchable pala ang raket ng dalawang iligalistang ito sa jurisdiction nina Nueva Ecija PNP Director Col. Leon Rosete at Bataan PNP Director Col. Villamor Tuliao, pwe!
Comments