PATTS, NAKADEPENSA AGAD VS. PASIG CATHOLIC SA MEN’S VOLLEY

PORMAL na binuksan ng PATTS College of Aero­nautics ang depensa ng ka­nilang korona sa 26th Na­tional Capital Region Athle­tic Association (NCRAA) Men’s Volleyball sa pama­magitan ng pagwasak sa bumibisitang Pasig Catholic College sa tatlong set, 25-14, 25-17 at 25-10, sa A. R. Valdez Hall Martes ng umaga.

Sinundan ang laro ng mahigpitang banggaan sa Women’s Division sa pa­gitan ng defending cham­pion National College of Business and Arts na pina­dapa ang Lyceum of the Phi­lippines University-Laguna, 25-22, 25-15 at 25-22.

Matapos ang dominan­teng unang set, pinalitan ni PATTS Coach Benjie Her­nandez ang lahat ng anim nilang manlalaro ngunit, hin­di nagbago ang re­sulta.

Bumalik muli ang mga be­terano sa ikatlong set upang siguraduhin ang ta­gumpay bilang regalo sa ka­nilang coach na nagdiwang din ng kanyang kaarawan.

Nahirapan ng husto ang NCBA laban sa mga ma­tatangkad na baguhan ng LPU ngunit, sa huli ay na­naig ang kanilang karanasan bilang kampeon para ma­itala ang kanilang ikalawang sunod na panalo.

“Hinamon ko ang mga reserba na magpakita nga­yon para handa sila sa mga susunod na laro kung tata­wagin ko sila,” wika ni NCBA coach Ernesto Ba­lubar bilang tugon kung bakit hindi niya agad ibi­nalik ang kanyang mga pambato kahit humabol ang LPU noong huling set.

Sa ibang mga laro ng kababaihan, winalis ng Emilio Aguinaldo College-Cavite ang Pasig Catholic College, 25-12, 25-13 at 25-12.

Nakabawi ang Centro Escolar University sa pag­katalo nila noong nakara­ang linggo sa NCBA at nakuha ang kanilang unang tagumpay sa Olivarez Col­lege, 25-17, 25-21 at 25-21.