Marawi rehab, hindi gagastusan — Duterte

NAGBABALA si Pa­ngu­long Rodrigo Duterte na hindi maglalabas ng pera ang gobyerno para sa muling pag­tata­tag ng mga gusali na labis na nawasak matapos ang sagupaan sa pagitan ng tropa ng pamahalaan at Maute Group na tuma­gal ng ilang buwan sa Marawi City.

Ito ang sinabi ng pangulo kasunod ng pag-amin na hindi niya makakayang ma­ibalik sa dati ang nasabing lungsod.

Kaya inihayag ni P-Du­terte na hahayaan niya ang mga negosyanteng may ka­kayahang gastusan ang re­habilitasyon sa lungsod. Ayon sa Punong Eheku­tibo, sa bawat Maranao ay may­roong mga negosyante at kasama na rito ang ilang sang­kot sa shabu.

“I don’t think that I should be spending for their buildings. Hindi ako magga­gasto ng ano,” ani P-Du­terte.

“Marami man ‘yang pera ‘yang mga tao diyan. Every Maranao, there is a businessman. Kasali na ‘yang shabu. May pera sila. The debate there is whether I would be also building the same kind that they lost. I don’t think I am ready for that,” diin ng pangulo.

Kaugnay nito, pinuri ng Chief Executive, ang Hou­sing and Urban Deve­lop­ment Coordinating Coun­cil (HUDCC) para sa mga na­ipatayo nitong pabahay sa Marawi City.