BEERMEN, ISA NA LANG FUELS, MAKAKABAWI BA?

ISANG hakbang na lang at sampa na sa championship round ang defending champion San Miguel Beer matapos kalusin sa Game 4 ang Phoenix Fuel Masters, 114-91 kagabi sa PBA Philippine Cup best-of-seven semifinals sa Cuneta Astrodome sa Pasay City.

Lumagok ng malaking kalamangan ang Beermen sa unang dalawang quarters, hinawakan nila ang 11-point lead, 59-48 sa halftime.

Nagpatuloy ang pananagasa ng San Miguel sa third period umalagwa ang kanilang lamang, 89-63 papasok ng fourth quarter.

Hindi nagpabaya ang Beermen sa payoff period, inalagaan ang kanilang abante upang makuha ang panalo.

Samantala, matapos ang dalawang sunod na talo, pinaalalahanan ni Rain or Shine forward Gabe Norwood ang kanyang mga kakampi na manatiling naka-pokus gaya ng ginawa nila sa unang dalawang panalo nila sa semifinals.

Tabla na ang serye sa 2-2 matapos manalo ng Magnolia sa Elasto Painters, 94-91 sa Game 4 noong Lunes.

“I thought our team kinda lost our composure and emotions got the best of us,” saad ni Norwood.

Inamin ni Norwood na napunta ang atensyon ng E-Painters sa mga tawag ng referees kaya nawala ang pokus nila sa laro.

“We played a lot better in the fourth quarter when we weren’t complaining (the calls) and not letting those things get into us,” hayag ni Norwood.

Napatawan ng technical si Norwood sa second quarter dahil sa pagprotesta sa tawag ng referees.

“My emotion got the best of me,” ani Norwood. “I felt the call wasn’t correct in my book, but I’m not the ref so that’s a tech and I deserved it.”

Best-of-seven ang bakbakan, sisimulan ang Game 5 ngayong alas-7 ng gabi sa parehong lugar. (ATD)