D-LEAGUE: BATANGAS-EAC, MALAPIT NA SA PLAYOFFS

BUHAY pa ang tsansa ng Batangas -EAC para sa 2019 PBA D-League play­offs matapos nilang ungu­san ang Family Mart-En­derun, 91-90, kahapon sa JCSGO Gym sa Cu­bao.

Isinalba ni Chris Dela Peña ang Generals sa kan­yang game-winning lay-up may 13.8 segundo na la­mang ang nalalabing oras sa laro.

May pagkakataon pa sana ang Titans na agawin ang tagumpay ngunit na­sawata ng Generals ang alley-oop na pasa ni Va­landre Chauca kay Joseph Kouakou sa huling posses­sion ng mga ito.

Tumapos si Dela Peña na may 12 puntos at 3 re­bounds upang pamunuan ang Batangas-EAC sa pagputol sa naitala nilang 4-game losing skid.

Dahil sa panalo, uma­ngat sila sa markang 2-5 sa Aspirants Group.

“Last time, I told them that we should learn how to win,” wika ni coach Oliver Bunyi na binalikan pa ang kanilang 119-122 double-overtime na ka­biguan sa AMA Online Education noong naka­raang linggo.

“This game, the effort was there and I’m very proud of them na kahit paano yung instructions, nasunod naman.”

Pinangunahan ni Ear­vin Mendoza ang Batan­gas-EAC sa ipinoste ni­tong 18 puntos, 4 rebounds, at 2 assists kasunod si Marwin Taywan na may 14 puntos, 5 assists, at 4 na rebounds.

Nawalan naman ng saysay ang 30 puntos ni Chauca dahil hindi nito nailigtas sa maagang eli­minasyon ang Titans na bumagsak sa ika-6 na su­nod nilang kabiguan. (VA)