‘Heat stroke break’ sa MMDA

BIBIGYAN ng Metropolitan Manila Development Authority (MMDA) ng karagdagang tatlumpung minutong “heat stroke break” araw-araw ang mga traffic enforcer at street sweeper ngayong summer.

Isang memorandum ang nilagdaan ni MMDA Chairman Danilo Lim, na muling nagpapatupad sa “heat stroke break policy”.

Ito ay upang maiwasan ang mga posibleng epekto ng matinding init tulad ng heat exhaustion, heat stroke at heat cramps.

Sa ilalim ng polisiya, maaaring umalis sa kanilang puwesto at mag-break ang mga naka-duty na field personnel para makapagpahinga.

May karagdagan ding 15-minutong breaktime para sa mga MMDA field personnel sakaling umabot sa 40 degrees Celsius o mas mataas pa ang heat index sa Metro Manila.

Napag-alaman na epektibo ang naturang polisiya hanggang Mayo 31.