PAG-ANGAT SA KARTADA, PAKAY NG 4 TEAMS SA PBA D-LEAGUE

UMANGAT mula sa ki­nalalagyang ilalim ng kani-kanilang grupo ang tatang­kain ng apat na mga kopo­nang nasa cellar na magsa­sagupa ngayong hapon sa pagpapatuloy ng 2019 PBA D-League sa JCSGO Gym sa Cubao.

Magkasunod sa kinala­lagyang ilalim ng Aspirants Group, magtutunggali sa unang laban ganap na 1 p.m. ang Batangas-Emilio Agui­naldo College at Family- Mart-Enderun College na susundan ng salpukan ng CD14 Designs-Trinity Uni­ver­sity of Asia at SMDC-National University na kasa­lukuyang magkasama sa bun­tot ng Foundation Group.

Sisikapin ng Generals na madagdagan ang nag-iisang panalong naiposte sa unang anim nilang laro habang magpupumilit ang Titans na masungkit na ang napaka­ilap na unang tagumpay upang makaahon sa kina­sad­lakang limang dikit na kabiguan.

Mag-uunahan namang makasama sa kanilang mga kagrupo na mayroon ng pa­nalo, ang dalawang winless teams ng Foundation Group na White Stallions at Bull­dogs na kapwa may karta­dang 0-5.

Pipilitin ng Gene­rals na makabawi mula sa nata­mong 119-122 overtime na pagkatalo sa huling laban nila noong Abril 15 sa AMA Online Education

Samantala, tatangkaing iwasan ng tatlong koponang FamilyMart-Enderun, CD14 Designs-Trinity at SMDC-NU na masundan pa ang naunang tig-5 nilang kabiguan. (VA)