Dahil sa init ng panahon; mga sunog na nagaganap sa bansa, nakababahala!
SA tindi ng init ng panahon, hindi na nakapagtataka na talamak ang sunog ngayon sa buong bansa.
Kung saan ayon sa Bureau of Fire Protection (BFP), tumaas umano ng 50 porsiyento ang fatality rate sa mga naganap na sunog sa unang quarter pa lang ng taon.
Ayon kay Bureau of Fire Protection (BFP) Spokesperson Fire Chief Inspector Jude delos Reyes, mayroon silang 111 naitalang namatay sa mga sunog, gayundin, 5,929 fire incidents ngayong 2019 na mas mataas kumpara noong 2018.
Dagdag pa rito, tumaas din ng dalawang porsiyento ang mga fire incident sa bansa mula Enero hanggang ikalawang linggo ng Abril ngayong taon dahil sa depektibong electrical connection, upos ng sigarilyo, kapabayaan sa kusina at init ng panahon.
Gayunman, nanguna sa mga may mataas na naitalang sunog ang Mindanao, Visayas at National Capital Region (NCR).
Nakababahala talaga ang pagkakaroon ng sunog dahil bukod sa maaabong mga gamit, buhay ang dapat ialay para lamang maapula ito.
Kaya naman patuloy nating ipinaaalala sa publiko na maging alerto at ipatupad ang malawakang information drive para maiwasan ang pagkakaroon ng sunog.
‘Ika nga, “kung tayo ay handa, sakuna ay walang panama”!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments