4 SCHOOLS, HANDA NA SA SEMIFINALS NG NCRAA
KUMPLETO na ang apat na paaralang pasok sa semifinals ng 26th National Capital Region Athletic Association (NCRAA) Juniors Basketball tournament sa pagwakas ng quarterfinals noong Lunes sa Saint Joseph Gymnasium ng Pasig Catholic College.
Kinailangan ng National College of Business and Arts ang overtime para talunin ang Immaculada Concepcion College, 90-88, sa tampok na laro.
Si Matthew John Sayson ang nagpatabla ng talaan sa pamamagitan ng kanyang tres sabay tunog ng busina ng huling quarter, 80-80. Mula roon, nagbuhos ng todo sina Aeron Verbo, Jonash Villas, Mark Froilan Nebre at Sayson sa dagdag na 5 minuto.
Nanatiling parehong walang talo ang Lyceum of the Philippines University-Laguna at Immaculate Conception Academy-EAC matapos nilang tambakan ang kanilang mga kalaro. Winakasan ng LPU ang kampanya ng De La Salle University-Dasmariñas, 94-80, habang pinalubog ng ICA-EAC ang Philippine Merchant Marine School, 91-73.
Sa isa pang quarterfinal, agad tinalo ng Saint Francis of Assisi College ang Pasig Catholic College, 91-65.
Nagsabog ng 34 puntos si John Matthew Santos para sa Junior Doves. Ang semifinals ay gaganapin sa Abril 22 sa NCBA-Fairview kung saan magtatapat ang NCBA at ICA-EAC at ang LPU at Saint Francis.
Ang mga magwawagi ay maglalaro para sa kampeonato sa Abril 24 sa Pasig Catholic College.
Samantala, nagsimula na ang torneo ng NCRAA sa Volleyball noong Martes sa NCBA-Fairview. Sinimulan ng NCBA Lady Wildcats ang depensa ng kanilang korona sa pagwalis sa Centro Escolar University sa apat na set, 25-15, 25-17, 26-28 at 25-18.
Kasama rin sa mga nanalo ang DLSU-D kontra Asian Institute of Maritime Studies (25-13, 25-13 at 25-17) at Immaculada Concepcion College laban sa Olivarez College (25-23, 22-25, 28-26 at 25-21).
Sa panig ng kalalakihan, tagumpay ang PMMS kontra AIMS sa limang set (19-25, 22-25, 25-16, 28-26 at 17-15), wagi ang DLSU-D sa CEU (25-20, 25-20 at 25-19) at dinaig ng NCBA ang EAC-Cavite (25-17, 25-19 at 26-24).
Comments