Iba't ibang mga pagbabago na mararanasan ng kabataan sa puberty stage
Dear Doc. Shane,
Ako ay mayroong isang anak na lalaki, siya ay 13 years old na at kamakailan lang siya nagpatuli. Anu-ano ba ang kakaibang pagbabagong mararanasan ng kabataan? Gusto ko kasing mapaghandaan niya ito upang madali siyang makapag-adjust. — Melissa
Sagot
Ang panahon ng adolescence ay bahagi sa buhay ng tao kung kailan nagaganap ang pinakamalaki at pinakamabilis na mga pagbabago sa maraming aspeto ng pagkatao. Ang mga pagbabagong ito ay napakahalaga at tiyak na makaaapekto sa buhay ng indibidwal at sa pakikitungo niya sa lipunan na kanyang ginagalawan. Sa panahong ito, pinakamabilis na nahuhubog ang personalidad, kakayahan, kaalaman at pag-angkop sa mga kaganapang emosyunal.
Kailan nagaganap ang mga pagbabago sa tao?
Walang espesipikong panahon na maiuugnay kung kailan magaganap ang mabilis na pagbabago sa pagkatao ng bawat indibidwal. Ang panahon ng mga pagbabagong pisikal, emosyunal, seksuwal at iba pang aspeto ay naiiba-iba sa bawat tao. Isa sa mahahalagang pagbabago na nagaganap sa adolescence period ay ang pagbabago sa hubog ng pangangatawan ng indibidwal mula sa pagiging bata patungo sa panahon ng pagbibinata o pagdadalaga.
Ang mga panahong ito na tinatawag na puberty stage ay binubuo ng mga sumusunod na pagbabagong pisikal:
Pagtubo ng mga buhok sa ilang bahagi ng katawan tulad ng kilikili, mukha na partikular sa kalalakihan at sa maseselang bahagi ng katawan sa parehong kasarian.
Mabilis na pagtangkad.
Paglapad ng balikat sa kalalakihan at balakang naman sa kababaihan.
Paglalim ng boses ng kalalakihan.
Paglaki ng mga dibdib ng kababaihan.
Pagsisimula ng menstrual cycle o buwanang dalaw sa kababaihan.
Ang mga pagbabagong ito ay dulot ng pagtaas ng mga lebel ng hormones: Testosterone sa mga lalaki at estrogen sa mga babae.
Tamang edad lamang na 13 ang pagpatuli mo sa anak mong lalaki, lalo na at bakasyon ngayon kung saan marami ang nagsasagawa at sumasailalim dito (circumcision).
Comments