MGA BATANG SUPERSTARS SA NBA PLAYOFFS, ABANGERS

SIKSIK na sa aksyon mula sa NBA playoffs ang matutunghayan ngayong Abril sa pagsisimula ng bakbakan ng 16 koponang may pag-asa pang mapana­lunan ang tropeong ipina­ngalan kay Larry O’Brien.

Gigil na nagpakitang-gilas ang mga bagitong superstar ng liga tulad nina Giannis Antetokounmpo ng Milwaukee Bucks, Nikola Jokic ng Denver Nuggets, at Aaron Gordon ng Orlando Magic at una nang natung­hayan ang kanilang pag-angat sa playoff game na nagsimula noong Abril 14, at itutuloy ang laro maliban sa araw ng Huwebes Santo, Biyernes Santo, at Sabado de Gloria.

Sinimulan ito ng Denver-San Antonio, kung saan nagtala ng triple-double si Jokic sa unang laro sa playoff maski nabigong makuha ang Game 1.

Sinundan ito ng pagsabog ng Houston sa pangunguna ng MVP front­runner na si James Harden laban sa batang pam­bato ng Utah na sina Rudy Gobert at Donovan Mit­chell.

Ngayong Abril 16, mapapanood ang Game 2 sa pagitan ng kampeon na Golden State Warriors kontra Los Angeles Clippers sa S + A ganap na 10:30 am, sa kampanya nilang maka­sungkit ng three-peat.

Nag­tala ng panibagong record si Steph Curry at pinatatag lalo ang bansag sa kanya bilang pinaka­mahusay na shooter ng NBA nang lampasan niya si Ray Allen sa pinaka­maraming naipasok na tres sa playoffs nang tambakan nila ang Clippers sa iskor na 121-104. (MC/ATD)