Bilyun-bilyong pondo sa LGUs, bantayan at talupan!

KA AMBO / BISTADO

WALANG kandidato ang nagsusulong ng awtonomiya sa local government units upang makakilos nang maayos.

Bakit kaya?

◘◘◘

WALA ring kandida­to sa pagka-senador ang nagpapanukala kung paano masusuri ang transaksiyon sa LGUs na karaniwang batbat ng korupsiyon.

Mahalagang ma­bantayan ang pondo sa LGUs kasi bilyun-bil­yong piso ang kaduda-dudang transaksiyon dito!

◘◘◘

MARAMI ang natu­tu­wa sa pagkakadeklara sa Malabon bilang “highly urbanized city” noong 2001.

Binibigyan ang lung­sod ng malawak na awtonomiya kabilang ang pagpataw ng buwis at iba pang kapangyari­han tulad ng pribadong korporasyon.

Mabigat ang res­pon­sibilidad na ito kung saan nagkaletse-letse ang transaksi­yong pampinansiyal!

◘◘◘

BATAY sa 2013 Commission on Audit report, natuklasang may P1.8 milyon ang hindi nairekord sa koleksiyon.

Saan ito napunta?

◘◘◘

PINAGDUDUDAHAN kung bakit nagkaroon ng P214, 213,576 na “unreconciled difference” sa book balances at Physical Report of Property, Plant and Equipment (PRPPE).

Paano kaya ibaba­lanse ang transaksi­yong ito?

◘◘◘

May naitala ring P38,306,496 “unliquidated cash advances”.

Ang paglalabas ng naturang pondo ay dapat may kalakip na dokumento at resibo kaya hindi malaman kung paano ito na­gastos!

◘◘◘

HINAHANAP din ng mga auditor ang P4.183 milyon sa treasury.

Saan nga ba ito napadpad?

◘◘◘

ANG koleksiyon ng Community Tax Certificates na aabot sa P3,708,028 ay hindi naibalik sa 21 barangays sa Malabon na dapat nagamit sa mga pro­yekto.

Hinihiling ng mga residente na ibalik ito sa kanilang barangay upang ma­pakinaba­ngan ng mamamayan.