GMA, maggu-goodbye na bilang Speaker, marami nang tulo-laway, he-he-he!
MATATAPOS na ang termino ni ex-PGMA bilang Speaker ng House of Representative.
Saan kaya siya itatalaga ni P-Digong?
◘◘◘
MARAMI ang naglalaway bilang Speaker kapalit ni Ate Glo.
Nagpahiwatig mismo si Rep. Antonio Floirendo, Jr. ng Davao!
◘◘◘
MORTAL na kaaway ni Floirendo ang dati niyang BFF at dating Speaker na si Rep. Pantaleon Alvarez, ang inagawan ng puwesto ni Ate Glo.
Tiyak na kakampi si Alvarez sa makakaribal ni Floirendo!
◘◘◘
ASPIRANTE si Rep. Martin Romualdez ng Leyte.
Nagpahiwatig din ang anak ng Supreme Court Justice Presbitero Velasco, Jr. na si Lord Allan Velasco!
◘◘◘
MABIGAT na makakaribal nila si dating DFA Secretary Alan Peter Cayetano na ineendorso mismo ni P-Digong.
Si Cayetano ay orihinal na miyembro ng core group ni P-Digong noong panahon ng kampanya!
◘◘◘
MASELAN ang sitwasyon ni Cayetano kasi nagbitiw siyang senador para tanggapin ang alok ni P-Digong na pangasiwaan ang DFA.
Ngayon, gusto ni P-Digong na maging Speaker sa Kamara si Cayetano dahil beterano raw ito sa gobyerno!
◘◘◘
MASELAN ang sitwasyon matapos ang eleksiyon ngayong Mayo kasi nanghihimasok ang mga dayuhan.
Delikado rin ang relasyon sa China.
Ang CPP-NPA-NDF ay bumalik sa pagiging rebelde.
Titiyakin ni P-Digong na kontrolado niya ang bawat sangay ng pamahalaan, partikular ang Kamara!
◘◘◘
SA ngayon, natengga ang badyet kasi hindi naman makontrol ni P-Digong ang Kamara kaya mahalagang kakampi ng Malacañang ang mayorya ng mga kongresista.
Hindi dapat maulit ang pagkatengga ng badyet sa 2020 kasi ora-de-peligro na ito!
◘◘◘
MATATAPOS na ang termino ni P-Digong matapos ang halalan, kailangan mapagtibay ang mahahalagang batas at maipatupad ang mga proyekto.
Kailangan ng Kamara ang lider na nakadikit sa Malacañang!
◘◘◘
ANG susi sa tagumpay ng Malacañang ay ang makasangga ang liderato ng Kamara.
Isang mahalagang papel ang gagampanan dito ni Cayetano.
Maganap kaya ito nang walang bulilyaso?
Comments